لكي يستمر الحب .. 2
من المشاكل بردو اللي بتواجه المحبين
إن كل طرف بيفكر في متطلباته الشخصية بشكل أكبر من شريكه
“أنا مبقولش كل المحبين إنما بعضهم”
بالتالي الطرف التاني بيحس إنه مهمل وبالتالي بيتعامل بشكل لا تلقائي بنفس الإسلوب وساعتها تبقى كارثة هتهدد بقاء العلاقة بأكملها
الحل الأمثل في نظري يتلخص في نقطة واحدة
في الحب إنسى نفسك وإهتم بالطرف الآخر فقط
البعض هيقول إن الواحد لازم بردو يهتم بنفسه ومينساش نفسه
كلام مظبوط
بس لو تلاحظو إنك لو فضلت طول الوقت تفكر في ايه اللي شريك حياتك محتاجه ولبيتله كل رغباته بالتالي هو هيبتدي إن يريحك ويهتم بيك
وبكدة يبقى انت بشكل غير مباشر اهتميت بنفسك
بس بدل ما تعمل كدة بنفسك خليت شريكك هو اللي يعمل كدة
ولما الإهتمام بيك يجي من الشخص اللي بتحبه أحلى بكتير لما يجي من نفسك
نقول كمان
بدل ما كل واحد فيكم يهتم بنفسه وياخد من وقت حبيبه لنفسه .. الأفضل إنه يهتم بحبيبه بس وحبيبه يعمل نفس الكلام معاه علشان نريح بعض ببعض
أتمنى يكون الكلام واصل ومفهوم
بسم الله
———
الكلام ما زال حلوا و مازلت تستمر في عدم اعطاء حل (مفيد هذه المره ) طيب لو احد الطرفين ابتدى يتفانى في التاني (ده حلك او انه يشوف التاني اكتر من نفسه ) ده غلط من ناحيتين الاولى ان التاني هيتعود على كده و يطلب اكتر (صفه بشريه مش عشان هو وحش ) و التاني انك لما تتغاضى عن حاجات بتكرها او تتنازل عن حاجات بتحبها من غير كلام عشان حبيبك على طول الوقت يبقى فين الاحتكاك المولد للعشره اللي هي اصل الحب و مولده و العامل على ابقاؤه ؟؟؟
متفهمش كلامي غلط انا مش قصدي عكس كلامك تماما بس الاعتداااااااال مطلوب لا كده قوي و لا كده قووي
و طبعا
غير كده حلو جميل قشطه الى الامام يا ابني
حلو اوى الموضوع وانا عاجبنى جدا بس انا راى زى ابراهيم خليك وسط فى كل حاجة لو فضلت تدى بس الطرف التانى هايتعود انه يا خد وما يديش وهاتربنى عنده الانانية والانانية لو جات فى الحب ممكن تدمره والاهتمام الزايد بيخنق وفعلا الحياة عشان تمشى لازم يكون فى جذر ومد لازم نبقى وسط فعلا
سبق وقولت ان الحب أخد وعطا
وبالتالي أي نصيحة بقولها في الحب لازم تكون متبادلة
ولما أقول ان كل واحد يهتم بإنه يدي ومينتظرش انه ياخد بقولها للإتنين عشان يكفو بعض زي ماقولت
أما بالنسبة لإبراهيم فدة سفيه وهقطع رجله عن المدونة دي أساسا
دة صاحبي يا جدعان وانا بشتمه على طول عادي يعني
بص يا مصطفى يا ابنى انا هاقولك حاجه واحده بس (فاقد الشىء لا يعطيه) يعنى لو انت ماحبتش نفسك مش هاتقدر تحب غيرك, وماتبقاش مثالى ذياده عن اللزوم لان طبعاً مافيش حد بيدى بدون مقابل, ولو مشيت بالطريقه دى هاييجى عليك يوم وهاتزهق وتمل من نفسك ومن حبيبك (خليك وسط وخليك واقعى وشوف الدنيا ماشيه اذاى)
وأنا مأنكرتش كلامك أبدا
لازم أحب نفسي آه
بس اللي بيحصل إن شدة حبك لشخص ما وحسب قوتها بتنسيك حبك وإهتمامك بنفسك
وأنا عن تجربتي بقول إن إهتمامي باللي بحبه هو جزء من إهتمامي بنفسي لشقين
الأول : إن سعادتي من سعادته .. وبالتالي انا بفرح لما بشوفه فرحان
التاني : إني لو عملت عشانه وهو معملش عشاني يبقى هو أساساً مبيديش وساعتها العلاقة هتدمر ومنها أبقى عرفت إن كان يستاهل ولا لا وينفعني ولا لا
عندك حق والله يا مصطفى بس ياريت الكل يعمل كدا
هنحقق السعاده لبعض
لكن الانانيه فى الحب اكييد بتقتل الحب ده