أخد وعطا
مش عارف إذا كان الكلام دة قولتو قبل كدة ولا لا
بس في الحالتين لازم أقولو تاني
أي علاقة في الدنيا بين أي أشخاص
مهما كان نوعها
مهما كانت درجتها
مادام دخل فيها كلمة حب
لازم العلاقة تكون متوازنة
والتوازن هنا هو مقدار كل حاجة خارجة وداخلة
التضحيات والتنازلات
الأفعال والأقوال
المشاعر والأحاسيس
لازم كل الكلام دة يتوزع بنسب متساوية لكل طرف
لو طرف بيضحي أكتر من طرف
لو طرف طول الوقت بيدي بس ومش بياخد او بيدي أكتر ما بياخد
لو طرف بياخد اكتر ما بيدي
مهما كان حب الطرف اللي انتقص من حقه
لازم هيجي يوم وهيجيب آخره
وساعتها هتكون مرحلة نهاية العلاقة
مهما كان الطرفين بيحبو بعض
مادام مفيش توازن
تبقى علاقة محكوم عليها بالفشل
الحب أخد وعطا
والأخد لازم يكون قد العطا
لو أخدت بنسبة 30% وعطيت بنسبة 70%
لازم المرة الجاية يبقى أخدك 70% وعطائك 30% علشان تعوض الفرق
وبعدها لازم تساوي كل مرة 50% أخد و50% عطا
ولو حبك طغا على كرامتك وشخصيتك
وغيرك للأسوأ
طلع قلبك من مكانه وحطه في برطمان
وقدر عقلك اللي غيبته وأهملته
إتأسفله وقولو يسامحك
وأطلب منه ميتخلاش عنك
ولو نخيت وقبلت بإن قلبك يسوقك ويلغي التساوي في نسب الأخد والعطا
تبقى قابلني لو فلحت
ولو حصل هديك عنوان تربتي علشان تيجي تعمل اللي عاوزه فوقيها
جزاكم الله خيرا
كلام جميل من انسان لية خبرة فى الحياة ولية امكانياتة الجزابة
وفصاحتة التى تثلج القلب
((أقتباس ))
طلع قلبك من مكانه وحطه في برطمان
———————-
انا فى الاول قلت لا كلامك ده مش صحيح لكن فعلا فكرت ورجعت بالزاكرة للخلف زي ماانت عارف ياياكي ان تجاربي قديمه وجامدا فعلا لقيت ان كلامك ميه ميه يامعلم عندك الحب اخد وعطا
زي الحله لازم يبقي فوقيها غطا
انا فعلا هافكر بجمله حط مكان قلبك برطمان فعلا هي فكرة حلوة بس البرطمان يبقي فاضي ولا مليان
علي فكرة ياياكي انا مش بهزر انا بسخر وبستهزء بالدنيا والظروف والحب وشويه حاجات فوق بعضها
سلام
أختك الكبيرة العزيزة عليك وده اكيد يعني
والله شكلك يا بنى واخد مقلب من بنت انما ايه مقلب حرامية صح
يا بنى مافيش فايدة فى ا بنت نفضلهم ترتاح وتريح
سيبك منهم مش هاينفعوك بحاجة
وخلى قلبك فى برطمان لغاية لما تتجوز ولما تتجوز طلعه وحطو مكانه
سلام
د/اشرف عبد المحسن
خير الكلام ما قل ودل ..
من حبنا حبناه وصار متعانا متاعة *** ومن باعنا بعناه ويحرم علينا اجتماعة
دا من واقع الحياه الاجتماعية
بالنسبة يا سيدي للدين
دا قدرك ونصيبك يا مصطفى
كل ما حاولت تصلح فكل حاجة وهيا بتبوظ تاني وتقع وتقوم وتكمل وتقع تاني وتقوم وتكمل اكيد يا اخي اتعلمت حاجة من كل دا ؟ انك كل مرة لما بتقع بتكتشف حاجة جديدة واكيد كل دا بتدبير وحكمة من ربنا علشان توصل لحاجة معينة ؟ ان دا قدرك يا ابن ادم ؟ الحكمة هنا انك اتعلمت واخدت الدرس ممكن تكمل مع خبرتك فى الدرس وممكن تفضل واقف وتيأس من الدنيا بس اعتقد ان الدنيا مش بتقف على حد .. قوم وكمل حياتك لسة الدنيا بخير وفيها حاجات كتيرة جداً لسة هتقع فيها تاني وتاخد خبرة بس المرادي لازم تاخد بالك كويس قبل متاخد اى خطوة علشان متكلفكش سنين تاني من عمرك .. وربنا يوفقك يا مصطفى ويزرقك بالانسانة الصالحة الى تفهمك وتفهمها ..
See U
طيب وايه رأيك فى خيانة واحدة لواحد او العكس بدون مبرر
ياترى انت خدت ولا اديت ولو اديت اديت قد ايه والطرف التانى عطاك اد ايه وفيته حقه ولاظلمته ولا العكس
مبيكونش حب
وفى الغالب الطرفين بيضحكو على بعض
الخيانة تعتبر نهاية العلاقة
الخيانة مينفعش معاها رجوع
بس لأنها حاسمة لازم نتأمد إذا كانت خيانة فعلا ولا لا
تعليق على كلام محمد انت تعرف حاجة علشان تقول كدة مصطفى معلش اتاخرت عليك بصراحة بعد الموضوع دة مفيش بالليل اتكلم عنة اسامه منير وانت بصراحة كنت افر كنت سمعتلها وصبرت عليها وما كنت تركتها للوساوس والشك لاكن انت تركتها وما سالت وعلى فكرة انت ادرى بالواقع
بص يا مصطفى انا مش هرد عليك باكتر من الى قولته فى الموضوع الى فات
ان الانثى كائن له عالم خاص يجب ان تتعلم اين تجد مفاتيحه
طيب لو مش عارفةبس الغيرة بتعذب والشك بيقتل يارتنى اعرف الحقيقةعلشان بس ارتاح ومظلمش حد بس بردو فى حاجة كبيرة اوى بتحصل مش بينفع معاها اى حل وتتحط حواجز جامدة اوى
عاجبنى اوى مصطلح حط قلبك فى برطمان بس هو احنا لو بنحب حد بيكون بأدنا ده ياريت نقدر نعمل كدة كونا مسمعناش عن جروح او نسمع كلمة ماينفعش ولا كان حد اتألم
هو انت زعلان ليه خد قرار حاسم شوية اما تسيب حبيبتك اما تفهمها وهى اكيد هتفهم خصوصا بعد ما قرأت عنها كل الى انت كتبه او ان تراجع نفسك وتشوف هى فعلا مش بتديك بس على فكرة لما تكون بتحب حد بجد مش بتستنى منه حاجة ومش بتبص هو ادى ايه واخد ايه بس اهم حاجة حاجة متشغلش بالك وانتبه لمستقبلك نسيت اقولك مدونتك جميلة جدا وكلامك روعة ربنا يوفقك
والله يا سارة اللي بيدي بس ومش بيستنى ياخد هيجي عليه وقت وهيحس بفجوة رهيبة في العلاقة بين الطرفين وساعتها هيغني أغنية كل شئ راح مننا مع انهم كان بإديهم يظبطوها من الأول بس سابو المشكلة بلا علاج لحد ما باظت الأمور
انا مش معاك يا مصطفى عمر ما فى علاقه متوازنه ولو حتى 80% غالبا بيبقى فى اخد و عطى زى ما بتقول بس مش بيبقى متكافئ و بيبقى فى حد بيدى بس فو ناس ممكن تدى 100% و يكفيها 30% بس من الى قدامها المهم انت تكون مستريح مع الى قدامك وطول ما انت حاسس بحبك ليك و اهتمامه بيك هتبقى مستريح بس الاهم الى قدامك ميتعودش على كده و يقدر و يفهم و قليل الى بيعمل كده انا شايف انك ممكن تنجح اى علاقه لو انت و الى معاك عاوزين كده وانتوا الاتنين بتهتموا بيها بالتفاوت
حضرتك يا بشندي بتقول ان فيه ناس بتكفيها 30% طول ما ما اللي قدامه محسسه بحبه واهتمامه وبيريحو صح كدة ؟؟
طيب ماهو هو دا العطا اللي انا بتكلم عنه
هو انت كنت فاكرني يعني بتكلم عن هدايا ودباديب ؟؟!!
التوازن في العلاقة مهم وانا ممكن أفضل أعمل أفعال حقيقية طول الوقت وآخد في المقابل بردو أفعال حقيقية بس مشاعر مش موجودة وفاضية يبقى أنا مأخدتش في الحالة دي
لو تلاحظ اني قولت ان العلاقة دخل فيها كلمة حب
يبقى في الحالة دي معظم الأخد والعطا اللي بتكلم عنه هنا هيكون مشاعر وأحاسيس وتضحيات